自過去到這馬，台灣人真愛看戲。對以早佇鬧熱廟會的戲台跤看戲曲，一直到這馬會當踮厝裡，佇電視甚至是網路頂懸看連續劇。戲劇種類有新嘛有舊，傳統戲曲已經流傳真久，毋但是對台灣人真重要的娛樂方式，嘛是見證台灣文化的改變佮傳承的珍貴文化資產。
這份教案有四節課。第一節課佇過去，透過走揣過去佮這馬的生活差別，予學生看著以早時代的生活娛樂。這引導學生進入第二節課佮第三節課，熟似布袋戲佮歌仔戲等等傳統戲曲，以及佮戲曲無仝元素有關的色水服裝、佈景佮語言聲韻歌仔冊。上尾仔，佇第四節課倒轉來現代，予學生熟似傳統戲曲佇現代的改變佮進步。過程中引 tshuā in 表達對藝術的想法。嘛呼應科技教育，透過紹介科技佮戲曲的結合，予學生了解科技的發展佮重要性。佇上課的過程中，學生使用科技設備佮線頂平台 (Kahoot!、Google Meet)，嘛是親身咧實踐科技教育。