本課以「越南飲食文化」佮「動物俗諺」作主題，希望透過跨文化佮臺語的結合，𤆬學生佇趣味當中學習臺語，而且培養學生的語言應用能力佮文化理解能力。課程分作兩部分。 第一部分介紹越南定定看到的飲食文化，親像「米線、春捲、法國麵包、椰子水佮越南咖啡」，遮的食物大部分佮臺灣學生生活中熟似的口味抑是飲食慣勢有連結，會使提升學生的學習動機。 第二部分介紹越南佮臺灣攏有的「十二生相」觀念，藉著共動物有關係的臺語俗諺，比論共「鳥鼠」、「龍」、「虎」、「牛」無仝生相有關的，予學生了解臺語當中按怎透過動物來表達生活中的智慧。 教學活動安排，以簡報進行主題教育、詞語佮句型練習、俗諺應用教學，最後以「臺語編劇創作」作尚尾的活動，予學生自由創作劇本然後透過角色扮演加深語言的運用，強調合作學習、創意表達佮實際應用能力。